منو القاليك تشوت ضفاري في ريدك

منو القاليك تشوت ضفاري في ريدك
دا دافوري الهوى الجواك
لا راجيهو شيل كاسك
ولا بحلم يكون عيدك
وبإيدك ... وما محسوب ويإيدك
بلنتي غرامك اتصدى
ومشاعرك هي البقت قيدك
تعيد قيد اللي ما حابيك
وتشطب للهواو سيدك
بتخسر نقطة من دمك
بتتسلل على جيدك
بتلقى الالفة هي الفاضحاك
من شريانها لوريدك
وبالخمسة .....
بتخسر انت بالخمسة
بخمسة حواسك الجواك
ما ظنيتها هي تفيدك
تميز بين صناعة الريد
وبين البحوي تهديدك
وبين البوضعك خطة
عشان يقراك ويعيدك
عشان يتحدى بيك الشوق
ويرجِّح بيه تسديدك
وبِحكُم رايتك قلبي
ولو جاوزت خط الروح
بتلقى اللهفة تهتف ليك
تشجع فيك ... وبتزيدك
يا سيد القلب آمر
يا صفوة حنان الريد
مليناهو تنديدك
بأنك يوم حتتوقف
وتعتزل اللي ما بريدك
منو الفي الدنيا ما بريدك
إلا يكون هو زول أشتر
وشات ضفاري في ريدك
دا يستاهل
منو القاليهو يشوت ضفاري في ريدك