دكشنري سوداني

موضوع: دكشنري سوداني السبت ديسمبر 25, 2010 5:03 am

دايما المغتربين
وناس الشهادات العربية لما بيرجعو السودان بيسمعو مصطلحات غريبة عليهم
ومافاهمين معناها شنو... طبعا الشماسة هم بتوع الكلمات دي
وانا حبيت اديكم فكرة بسيطة عن كلام المهم ما طول عليكم..
(الجلك والجلكينة)يعني ابوك وامك
(والتفتيحة)يعني الزول الفاهم والواعي ويعرف كيف يكب (ويحنك الفارات)يعني
يغش العورين
(والشتات يا فردة)يعني نحن مشينا او جرينا
(والجوكي)هو سواق الركشة
(يفكوك عكس الهواء)يعني يرفضوك
(والقدة)زول كلامو كتير او يقولو فلانة (شدة وغسيل عدة) يعني بت حلوة شديد
(وفلان وعارض)يعني بيجيب النحس (وفلان مقحط،) يعني ما عندو قروش
(الشرتيت أو الكنجالات او الضحاكات او التشديرة،) يعني القروش
ويقولو (فلان دا حَمَامَ او طيرة)يعني زول عوييير وما عندو شخصية، عكسها
فلان دا (راسطا )يعني زول رهييب ومبالغة
(والسكسكة والجبجبة والحتحتة)رقصات في الحفلات، وفلان (صبّن الكيس)يعني
دساه، وفلان (دقس واتلحس)يعني غشو واكلوا حقوا..
وفلان عمل (وهمة)يعني زي ماتقولو عمل حركة جديدة..وفلان (مستنكح)يعني بيغش
الناس
(عصلج)يعني ابى يسمع الكلام وفلان (عملوا ليه شرحبيل)يعني شّروه وكذبوا
عليهو (وعملوا منه زغبير)،يعني زاغوا منو
وكلمة(دفار)الشماسة بيقولوها للمره السمينة، و(الرقشة)للمره الضعيفة.وفلان
(هرشناه وكحلناه عروض،)يعني خوفناه وارهبناه.
(وجضّم الشئ)يعني عرفليهو، والفطور اسمو (فاطمة الحاج)والغدا (القدمبلية)،
والعشاء هو (عشمانة)
(وجرَّ نور)يعني عاين مدة طويلة. زول (ما ناقٍش مسطح)يعني اهبل
وفلان (مجنتر او فاطي سطر او مولع)يعني مافي كامل قواه العقلية هههههه
وفلان (متكل في ترطيبة متشرشح)يعني مرتاح
وفلان (كسح وفتح ، وقد سلك رقد صوف)كلها بمعنى الهروب....
ودا كلوووو والله عشان الناس ماتتبهدل ويقومو يطلقو عليهم المصطلحات دي
ويقولو ليك كلام فارغ وشهادة عربية ومابعرف شنو الخ . يالله ياحلوين زيدونا
حبة من الكلام الفاضي دا لو عارفين حاجات تانية وفي النهاية مستني ردودكم
وتعليقاتكم